Fijian Wesleyan Methodist Church of Melbourne.

Bible readings: Same 111; 1 Koronica 8: 1-13

Ulutaga: verse 9: Qarauna mo kakua ni vakatarabetaka e dua e na ka o cakava.

O ira mai Koronica era dau veilakovi, ka ra veisureti me ra dau laki kana vata. Oya e dua na itovo e tiki tu ni nodra bula.

E tiki talega ni nodra bula me ra dau laki vakacabora taumada na kakana me volitaki se me vakasaqari e vale vua n na nodra Kalou matakau.

Na gauna e qai vosa tiko kina o Paula e na 1 Koronica 8: 1-13; sa ra lotu e so mai Koronica.

Era sa kila na Kalou ka vakabibi era sa tekivu vakabauta me ra kila na cakacaka ni veivakabulai ka mai cakava o Jisu. O ira beka oqo e tukuni tiko e na tiki ni Ivola Tabu oqo – ni ra sa vuku – era vuku ena veika vakayalo.

Ia sa mai wase rua tiko na ilala lotu oqo me baleta na kakana era laki kania e na gauna era dau sureti kina mai vei ira na tawa vakabauta se o ira era sega ni vakabauta na Kalou ko Jiova.

Wilika e na tikina e vitu:

“...sa so era sa nanuma sa dina na matakau, a ra sa kania mevaka sa vakabori kina matakau, a sa dukadukali kina na yalodra ni sa malumalumu.”

Wilika na tikina e walu:

“Ia na kakana na sega ni ka eda vinaka kina vua na Kalou: ia kevaka eda sa kana, eda sa sega kina ni vinaka cake: kevaka eda sega ni kana, eda sega ni ca sobu.”

Rua na vakasama sa tiko rawa veiira mai Koronica ka ra qai tarogi Paula, se cava me ra cakava ka ni sega ni vinaka me ra tawase tu vakaoqo na lewe ni lotu.

(Au kila ni dau levu tale tu ga na ka eda dau tawase tale tu ga kina na lotu vakakarisito e na gauna oqo. Vakabibi ni so na tiki ni noda vakabauta e sega sara ni matata na ka e vinakata vei keda na Kalou.)

Sau ni taro nei Paula vei irau na ito e rua e na gauna oya, ka sa digitaki talega na tikina oqo me noda yavutaki kina na noda ulutaga ni kua e kune e na tikina E CIWA:

Tikina 9.

“Ia mo dou raica vinaka de yaco na nomudou veitalia vakaoqo me ka era tarabe kina ko ira era sa malumalumu.”

Ke biu beka e na dua na kena ituvatuva matata:

Qarauna mo kakua ni vakatarabetaka e dua e na ka o cakava.

Tukuna o Paula: Na ka e bibi oqo: Mo dau nanumi ira era raica tiko na ka o cakava, Dau nanumi ira era rogoca tiko na ka o tukuna, De so era na qai tarabe kina ka ni se malumalumu na nodra bula vakayalo.

E tolu na ka e dodonu meda qaqarauni kina.

  1. NA VUKU SE KILA KA
  2. NA BULA GALALA
  3. NA NOMU DIGIDIGI

Matai ni vakasama:

1. Na vuku se kila ka

Qarauna me kakua ni vakatarabetaka e dua na nomu kila ka.

Era tukuna na tasereka na tikini ni iVola Tabu oqo, ni o ira na kai Kirisi ( levu mai Koronica era kai Kirisi) e na gauna oya era tukuna ni ra tamata vuku.

O ni kila vinaka ni evu na ka eda vulica tu e na gauna oqo, era a tekivu vulica e na gauna nei Paula na kai Kirisi, mevaka na mathematics, Science, Buli ka, na wili vola, veika me baleta na vuravura tale eso, Astronomy kei na vuqa tale.

E na gauna sa yaco yani kina na veivakalotutaki nei Paula, eso sara ga veiira na vuku oqori era sa tekivu me ra vakabauti Jisu Karisito.

O ira talega sa ra ga oqo sa ra mai tawase e na nodra taura matua na veika era vakabauta ka ni rawarawa veiira me ra solia na ivakamacala ni nodra vakabauta.

Dua na ito nodra vakasama oqo: au na sega ni kania na kakana oqori baleta ni sa vakacabori veiira na matakau.

Dua tale na ito na nodra vakasama oqo: au na kania na kakana oqori baleta ni sega ni na mai vakatarabetaka na noqu veiwekani kei na noqu Kalouo Jiova na ka au kania.

Sa qai tukuna o Paula veiira oqo e na matai ni tikina ni noda lesoni.

“na vuku sa vu ni viavialevu. A loloma ga a vakatataki cake.”

Tukuna o Paula veiira era veiba tiko e na gauna oya. Dou veiraiyaki mada.

Dou raica vakarabailevu na ka dou cakava tiko.

E sega ni yaga ni na nomudou bula vakayalo se na nodra bula vakayalo na vakabauta vou na ka dou veibataka tiko. Na ka bibi mo dou veilomani.

Dou veilomanitaka na ka dou dui nanuma. Sega ni vinaka mo dou veiba taka.

Vakacava e rawa mo dou dabe vata ka dou veivosaki ka dou qai vakacabora vua na Kalou na nomudou duidui.

Tikina e 2:

“Ia kevaka e dua sa nanuma sa kila e dua na ka, sa sega ni kila na ka me vaka e dodonu me kila. Ia kevaka e dua sa lomana na Kalou, sa kilai vua ko koya.”

Na Kalou, e kila na dui yalomudou: ke dou cakava na ka e na yalo vinaka, e na kila na Kalou, kevaka dou cakava na ka me na vakacerecerei tiko kina na Kalou, e na kila na Kalou na lomamu.

Same 139: “I Jiova ko ni sa dikevi au, ka kilai au..”

Vakamacala: Na Kalou e kila na veika kecega :
OMINISCIENT GOD.

Vakabibitaka o Paula ni kua, vei kemudrau na ito ruarua, lomani ira e se qai tekivu vakabauta na Kalou, lomani ira na tawa vakabauta - ko ni vinakata tiko me ra kila na Kalou- me ra kila na ka e uasivita duauda na veika kecega- uasivita na lawa a soli vei Mosese – sa ikoya na loloma.

Dou kakua sara ni cakava e dua na ka me vakatarabetaki ira oqori. Dou veilomanitaka na ka dou cakava. Me ra rai tiko mai, ka ra taleitaka na ka era raica.

Me ra raica tiko mai ni boro tu na vosa na LOLOMA e na Lotu Vakarisito – veiira na kena vavakoso - o ira na veiliutaki – o ira na kena gone – oira na kena qase.

Sa sega kina na loma ca.

Tukuna toka na dau ni Same ni kua:

“Na rerevaki Jiova sa kenai vakatekivu na vuku: Era na yalomatua kecega ko ira era sa cakava na nona vunau.”

So na gauna kemuni na Turaga kei na marama, eda sa cakava oti, se via cakava e dua na ka, sa da qai via solia e dua na ivakamacala me sotava rawa mada ga na lomada.

Ia eda sega ni bau nanuma ira era tu wavoliti keda. O ira na luveda:

Maciu 18:6 - “ ia ko koya sa vakacala e dua vei ira na lalai oqo era sa vakabauti au, sa vinaka vua kevaka ka vakarubeci e domona e dua na vatu iqaqi levu, ka vakadromutaki e na wasaliwa titobu.”

O ira na wekada, o ira na noda itokani.

O ira oqo era raica tu na ka eda cakava – na cava era na nanuma me baleti keda? O keda eda sa wiliki keda meda luve ni Kalou.

Noda matai tiko ni vakasama:

Qarauna me kakua ni vakatarabetaka e dua na nomu kila ka.

Karua ni vakasama:

2. NA BULA GALALA

Qarauna mo vakayagataka vakavuku na nomu bula galala ka mo kakua ni vakatarabetaka e dua.

Eda sega ni vakabekataka ni soli tu veikeda na galala meda cakava ga na ka eda via cakava e na vuravura oqo.

Vei ira na kai Koronica e na gauna oya , e soli veiira na galala me ra kania na kakana e veivosakitaki tiko oqo, se me ra kakua ni kania. Vakatau sara tu ga vei ira.

Na vosa oqo na “bula galala” se “ freedom” e sa tiki tu ni noda bula.

Na ka e vosa tiko kina o Paula – mo vakayagataka vakacava na nomu bula galala oqori.

Qo na taro e taroga tiko o Paula vei ira na veiba tiko e na siga oya.

  1. O na vakayagataka na nomu bula galala mo vakadonui iko ga vakai iko? Donu vinaka na noqu vakasama, cala kece o ira oqo, ra qai lewai ira.

Se

  1. O na vakayagataka na nomu bula galala mo na raica kina vakararaba na ka? De dua e vinaka me keirau raica vata kei na noqu itokani na cava e duidui kina na neirau vakasama. Oi keirau, keirau tamata, e vinaka cake me keirau raica na cava e bibi vua na Kalou, ia na ka bibi vua na Kalou, sa ikoya na ka keirau na vakaliuca.

Kevaka e se lomalomarua tiko na lomamu na wekaqu raica na ka e tukuna o Paula e na tikina 6:

“Ia vei keda sa dua bauga na Kalou, na Tamada, sa vu ni vei koya na ka kecega, eda sa nona ga koi keda: a sa dua bauga na Turaga ko Jisu Karisito, sa caka kina na ka kecega, ia koi keda e na vukuna.”

Io, na noda bula galala oqo au vakabauta ni tukuna tiko veikeda o Paula ni kua meda vakayagataka me yaga ki na cakacaka e sa mai tekivuna na Gone Turaga o Jisu Karisito.

Oya na bula ni duavata; bula ni vei lomani, bula ni veirogorogoci kei na bula ni veitataki cake.

Ena noda bula vata oqori sa na dodonu talega kina me da dau vakayagataka sara vakayalomatua na galala e noda – ka a soli me noda e na vuku I Jisu Karisito.

Levu na vanua o rawa ni vakayagataka kina na bula galala oqo, e vale, e vanua ni cakacaka, e na vanua o gade kina se evei tale, ia ni kua e vakabibitaka o Paula na nomu vakayagataka na bula galala oqori e na loma ni vavakoso lotu; sega walega na vavakoso lotu o lewena, na vavakoso lotu mai Viti, na vavakoso lotu e Ositerelia raraba, na ivavakoso lotu e vuravura.

Dua na ka e tukuna ka vakadeitaka vei keda o Paula ni duidui na vakatagedegede ni vakabauta e tu veikeda e na loma ni lotu.

Wilika na Roma 15: 1 lako yani - E na loma ni lotu e tu o ira era kaukauwa se o ira beka sa matua na nodra bula vakayalo ka tu o ira era malumalumu se o ira beka era se qai soli bula.

Vosa tiko o Paula ka kaya. “ Dou veivosvosoti, tabeya cake na nodra malumalumu na se sega ni kaukauwa, kitaka na ka e vinaka vua, na ka e yaga me vakatavulici kina o koya..”

Vakasamataka na veika eda cakava – vosa tiko vakabibi veiira era sa qase beka ni lotu, se ra Siga Dina…

Kevaka o laki danisi, veimau I lavo mevaka na kati, gunu yaqona ni vavalagi, vosa ca, dau kakase, dau vakalelewa, ka ra rai tu tu o ira o kila ni ra malumalumu vakayalo. Na cava era na tukuna . Ke sa ra cakava oqo o ira na matua vakayalo kena ibalebale e vinaka vua na Kalou na veika kece oqo!!!!!!

Meda nanuma tiko kemuni na veiwekani:

Qarauna mo vakayagataka vakavuku na nomu bula galala ka mo kakua ni vakatarabetaka e dua.

Na ika tolu ni vakasama e rau veivolekati sara kei na Bula gagala sa ikoya na noda digidigi.

3. NA NOMU DIGIDIGI

Qarauna digitaka vakavuku na ka o kitaka ka mo kakua ni vakatatarabetaka e dua.

Rogoca na ka e tukuna o Paula e na tikina e 10:

“ Ia kevaka e dua sa raici iko na tamata vuku ni ko sa tiko e na vale ni matakau mo kana, e na qai sega li ni doudou cake kina na loma I koya sa malumalumu me kania na veika sa cabori kina matakau?”

Rai nei koya sa kaukauwa na nona vakabauti Jisu Karisito: E sega ni na vakacacana na noqu veiwekani kei na Kalou na noqu kania na kakana oqo.

Rai nei koya e malumalumu na nona vakabauta: U e kania o ka ya na kakana oqo, ke na ibalebale au na kalougata talega kevaka au kania na kakana e vakacabori vua na Kalou matakau. Wow, e tu talega na nodra kaukauwa na Kalou matakau. Rau tautauvata sara ga na Kalou matakau oya kei Jisu Karisito

Tukuna tiko o Paula ni kua, dou qarauna vakavinaka na ka dou cakava, kevaka o sa kania na kakana oqori, o sa vakatarabe taka na wekamu, kakua ni kania.

Se meda taura vakararaba na itukutuku oqo e vaka toka beka oqo na kena rorogo:

Dou qarauna vakavinaka na ka dou cakava, kevaka o kila ni na vakatarabetaka kina na wekamu kakua ni cakava.

Veikeda eda wili tu meda qase ni lotu, matua vakayalo se Dauvunau.

E levu beka na lawa vakalotu e tu na noda bula, e sega ni dodonu meu cakava qo, se cakava qo, eda da au vakataroga “Na cava meu kua ni cakava kina qo, se qo”.

Ni kua au na via vakaraitaka yani vei kemuni ni vuqa na ka e vauca tu na noda bula na yavutaki tiko e na vunau nei Paula veiira na kai Koronica.

“Ia mo dou raica vinaka de yaco na nomudou veitalia vakaoqo me ka era tarabe kina ko ira era sa malumalumu.”

“ Ia ni dou sa cala vakaoqo, vei ira na veiwekani ka vakacacana na lomadra sa malumalumu, dou sa cala vei Karisito.”

Au sega ni kila na cava eda cakava tiko e na rawa ni vakacala e dua e se malumalumu na nona vakabauta.

Ia na ka ga au rawa ni tukuna veikemuni ni kua, ni sa dodonu ga meda vakayaloqaqataki e na itukutuku vinaka I Jisu Karsitio - sa ikoya na noda dau vakarorogo ki na Yalo Tabu.

Ka bibi veikeda oqori.

Baleta na Yalo Tabu na Yalo ni Kalou, Na Yalo ni Kalou e na tukuna veikeda na veika e vinaka Vua na Kalou .

Totoka tiki ni Vola Tabu e kune e na Vosa vakaibalebale wase 5;

“Na luvequ, mo vakarorogo kina noqu vuku. Vakalakala daligamu ki na noqu yalomatua: Mo vakabauta ki na lomavuku, Ia me tu ga e na tebe ni gusumu na vosa vuku.”

“My son, give attention to my wisdom, incline your ear to my understanding; that you may observe discretion and your lips may reserve knowledge.”

Ia ni sa tu veikeda na vuku vakalou sa na qai rawa meda na qaqarauni.

Da qarauna meda kakua sara ni da cakava e dua na ka me vakatarabetaka kina wekada ka se malumalu tu na nona bula vakayalo.

Meda qarauna na noda

Na vuku se kila ka

Vakayagataka vakavinaka na bula galala sa soli vei keda e na vuku I Jisu Karisito

Digitaka vakavuku na sala o muria de lakolako e na sikalutu tale kina na wekamu.

Me na vakakalougatataki keda na Turaga e na itukutuku eda sa wilika oti.

Masu.

Turaga vinaka vakalevu na nomuni vosa ni Kalou. Vosota Turaga na noqu malumalumu kau dau cakava kina na ka e tawa kilikili e matamuni. Vakabibi Turaga niu dau cakava na veika ka dau vakamalumalumutaka na nodra veiwekani kei kemuni na noqui tokani. Kerea na nomuni Yalo Tabu me vakatavulici ka idusdusi tiko vei au e na veisiga. Jisu na I Vakabula.

Emeni.

Back to top of page    Coburg Church Web Page    Return to Ozfiji